Joan zen urtean jasotako arrakasta ikusirik, aurten ere magiaren inguruan hiru jardunaldi egingo dituzte.
Lehenengo emanaldia maiatzaren 5ean izango da, Migue magoaren eskutik, 22:30ean. Miguel Pugak Munduko karta-magia txapelketa irabazi zuen 2003an (1973an Juan Tamariz eta 1988an Pepe Carrol nagusitu ziren).
Bost mago zapatuan
Maiatzaren 6ko emanaldian, berriz, Jandro, Jorge Blass, Arno, Karim eta Francisco Aparicio arituko dira, 22:30ean hasita. Hain zuzen ere, joan den urteko ekitalditik Jandro da errepikatuko duen bakarra. Publikoaren saria eskuratu zuen iaz eta berriro bere magiarekin eta umorearekin gozatzeko aukera izango dute ikusleek.
Zapatuko emanaldian maila handiko magoak izango ditu alboan: Jorge Blassek nazioarteko hainbat sari lortu ditu; Monakoko jaialdian saritutakoa da Arno; Donostian eszenako magia saria irabazi zuen Karim-ek eta Francisco Aparicio pick-pocket-aren maisuetako bat da.
Domeka, haurrei zuzenduta
Lehen bi emanaldiak publiko helduari zuzenduta badaude ere, txikienei zuzendutako jardunaldia izango da azkena, domekakoa. Eguerdia ezkero hainbat saio egingo dituzte kalean eta herriko beste hainbat txokotan, eta 13:00etan magia eta globoflexia ikuskizuna eskainiko dute Arabako Ilusionismo Elkartekoek. Arratsaldean, berriz, Jean Philippe Atchoum frantziarrak globomagia saioa egingo du Espaloian, 19:00etan.
Gasteizen egiten den jaialdiarekin batera, Euskal Herriko magia jaialdirik onenetakoa da Elgetakoa. Hurrengo urtean Juan Tamariz etorriko dela ia ziurtzat eman dute antolatzaileek.
Jaialdiak 42.000 euro inguruko aurrekontua dauka. Egubakoitz eta zapatuko emanaldietarako sarrerak 15 eurotan salduko dituzte eta amaiera ekitaldikoak, 12 eurotan. Kafe Antzokiko bazkideendako merkeagoak izango dira sarrerak.