Ertzainekin batera, Erkidegoko hiru hiriburuetako eta zenbait udalerritako udaltzainek esku hartuko dute kanpainan. Radarraren erabilera areagotuko dute kanpaina honetarako, eta halako kontrolak egiten dituzten agenteen kopurua handitu.
Kontrolak egingo dira istripu gehien gertatzen diren errepideetan eta baimendutako abiadura gehien gainditzen den lekuetan; lanetan dauden tokietan edota abiadura aldi baterako murriztu duten lekuetan ere egingo dira kontrolak.
Radar finko eta mugikorren bitartez eramango da aurrera kanpaina, eta Ertzaintzaren bereizgarriak dituzten ibilgailuak nahiz batere ez dutenak erabiliko dira.
%30ak errespetatzen du abiadura
2005ean Ertzaintzak ia 400 mila ibilgailu kontrolatu zituen eta horietatik 11 milak baino gehiagok gainditu zuten baimendutako gehienezko abiadura. Urte horretan bertan publikatutako Eusko Jaurlaritzako Trafiko Zuzendaritzaren inkestak dioenaren arabera, galdetutako lagunen %30ek soilik errespetatzen dute abiadura muga autobidean. Bestalde, Kooperazio eta Garapen Ekonomikorako Erakundeak eginiko ikerketan azaltzen denez, herrialde garatuetan hildakoren bat eragindako istripuen %30etan gehiegizko abiadura egoten da tartean.
Abiarazi berri duten kanpainaren iraupena 15 egunekoa izango den arren, Ertzaintzak gogorarazi du abiadura-kontrolak urte osoan zehar egiten direla.