Beasain-Durango autobiako Gipuzkoako zatia ia 30 kilometro luze izango da. Horietatik ia 20 Beasaindik Zumarragara bitartekoak dira eta irekita daude; Gipuzkoako lanak bukatzeko Zumarragatik Bergarara doan zatia eraikitzea falta da orain, eta urte honetan bertan hasiko dituzte lanak.
Urrian ekingo diote 3 kilometro luze den Zumarraga-Urretxu tarteari; 2 urteko epea eta 50 milioi euroko aurrekontua dituzte horretarako. Lanak hasten diren une berean, Urretxu-Bergara zatiaren eraikuntza proiektua lantzen hasiko dira. Kasu horretan, 6,7 kilometro dira egin beharrekoak, 2008an eraikitzen hasi eta 2010erako bukatzea da asmoa, 100 milioi euroko aurrekontuarekin.
Autobiaren tarterik konplexuena
Bi fasetan egingo da, beraz, Zumarraga eta Bergara arteko autobia. Gipuzkoatik igaroko den Beasain-Durango autobide zatiaren barruan, tarterik konplexuena eta garestiena izango da, bi tunel eta sei zubirekin. Aipatutako kilometroez gain, gainera, beste bi gehiago eraiki beharko dira Antzuola, Legazpi eta Zumarragarekin lotzeko.
Bizkaiko zatia
Behin Bergarara iritsita, handik Bizkaira joateko, Eibar-Gasteiz autobidea edo Kanpanzarko bidea hartu ahal izango dira, momentuz . Bizkaiko Foru Aldundiari dagokio mugatik Durangora arteko tartea eraikitzea.