Aldarrikapen oihuak entzun ziren Aretxabaletako Inauterietako domekan. Herriko plaza 200 bat lagunek hartu zuten. Tejero buru zutela, han ziren armadakoak, Brave Heart filmeko gudariak, Mexikon TNT leherkariak jartzen zituztenak, asaltoko urpekariak eta beste hainbat aretxabaletar gazte, F-23+3 Ekimenak deituta. Azaroa ezkero herriko Aratusteak elkarlanean antolatzeko ekimenari Udaletik jasotako erantzun eskasa salatzeko asmoz egin zuten aldarrikapena gazteek, sekulako jai giroan.
Euria gogotik
Eguraldi eskasari aurpegi alaia jarri zioten aretxabaletarrek atzo. A ze erremedio, atertu barik egon zen-eta egun guztia! Eta zapatuan ere gauza bera: euria gau partean! Aterpean izan ziren eskoriatzarrak eta arrasatearrak herri bazkarian eta baita gatzagarrak ere herri afarian. Aramaioko txikienek txokolate beroa hartzeko aukera izan zuten hotzari aurre egiteko, eta Bergarako umeek Pirritx eta Porrotx pilotalekuan. Oñatin eta Antzuolan, berriz, dantzariek jarri dute Aratuste giroa. Atzo Luzaideko Inauteriak antzeztu zituzten Oñatz dantza taldekoek Oñatin, eta herriko pilotalekuan babestu behar izan zuten Sorgin Dantza egiteko antzuolarrek.
Eguraldiarekin zortea izan duten bakarrak elgetarrak izan dira aurten. Egubakoitzean mozorrotu ziren-eta.