Ia hiru urte pasa dira 2003ko udal hauteskundeak egin zirenetik eta Debagoieneko herri plataformek momentu hau aukeratu dute orain arteko ibilbidearen balantzea egiteko eta datozen urteetarako izango diren lan ildoak zehazteko.
Apartheid egoera salatu
Bergaran martitzenean egin zuten prentsa aurrekoan, "apartheid egoera gainditzea ezinbestekoa" dela esan zuten. Egoera horrek, balore ezkertiarreko ongizate gizartea sortzen galerazi diela esan zuten. Ezker abertzaleko ordezkarien hitzetan, ondorioak nabermenak izan dira. "Uraren eta gasaren tasak neurri gabe igo dira eta argi ikusten da gure eskualdeko udalekpribatizaziorako hartu duten joera, Oñatiko hiltegiaren kasuan gertatu den bezala", zehaztu zuten herri plataformetako kideeek.
Mankomunitatea geldi
Bide berean, Mankomunitatea bera ere geldi dagoela salatu zuten prentsa aurrekoan. Tranbia, Olandixoko eta Epeleko tunelak eta beste proiektu batzuk egon badaudela, baina kanpoko erakundeetatik datozela esan zuten. "Ez da ikusten plan orokor eta parte-hartzailerik bertako udalek edo Mankomunitateak egindakoa", gaineratu zuten.
Hurrengo hauteskundeei begira
Debagoienako herri plataformetako kideek adierazi zuten bezala, "inork ez du ezer egin apartheid egoera gainditzeko" eta Udaletan zein Mankomunitatean bizi duten egoera salatu zuten. Egungo momentu politikoa ezin dela galtzen utzi ere esan zuten. Herri plataformak hasi dira barne hausnarketak egiten eta martxan jarriko duten estrategia zehazten 2007ko hauteskundeei begira.