Elbarrituta dauden edo ohiko garraiobideak erabiltzeko zailtasunak dituzten ikasleak, Unibertsitatera joan nahi badute, adi egon beharko dira abenduan batez ere. Jaurlaritzako Etxebizitza eta Gizarte Gaietako Sailak 100.000 euro bideratuko ditu laguntza horiek emateko. Eskatzaile bakoitzari gehienez 12.000 euro emango dizkio Jaurlaritzak, baina kasu gehienetan unibertsitaterako joan etorrien gastuen ehuneko ehuna ordainduko du.
Aurten diru gehiago
Aurten igo egin dute ikasle ezinduendako garraioa ordaintzeko aurrekontua. 100.000 euro dira aurten eta iaz 60.000 euro izan ziren. Iaz 28 lagunek izan zituzten garraioa ordaintzeko laguntzak. Gutxien jaso zuenak 39 euro hartu zituen eta gehien jaso zuenak 7.350 euro hartu zituen.
Ikasle ezinduek baldintza batzuk bete behar dituzte laguntzak hartzeko: %30eko ezgaitasuna edo handiagoa izatea, garraio kolektiboak erabiltzeko zailtasunak izatea eta ikasturte honetan goi-mailako lehenengo eta bigarren zikloko edota graduondoko ikasketak egiten ibiltzea Euskal Autonomia Erkidegoko edozein unibertsitatetan. Eusko Jaurlaritzako Etxebizitza eta Gizarte Gaietako Sailak Euskal Herriko Agintaritzaren Aldizkarian argitaratuko du diru-laguntzok arautzeko agindua. Hori abenduan egingo dutela uste dute. Ba agindua argitaratzen den egunetik aurrera, hilabete izango dute interesatuek diru-laguntza eskatzeko. Beraz, Unibertsitaterako garraioa ordaintzeko diru-laguntzak behar dituzten ezinduak adi egon, abenduan zabalduko da-eta eskaerak egiteko epea.