Aaiuneko eta Smarako kanpalekuetatik etorritako 19 haur sahararrek igaro dute uda Debagoienean. 13k Arrasaten, 3k Bergaran, 2k Oñatin eta 1ek Antzuolan. 2 hilabete inguru eman dituzte gure artean, eta gaur etxerako bidea hartu dute.
Neska-mutikook eurekin izan dituztenek une politak eta zailak, denetarikoak bizi izan dituztela azaldu diote Goitb-ri, baina esperientzia aberasgarria izan dela finean.
3 Euskal Herrian geratuko dira
Udako oporraldia Debagoienean igaro duten 19 haurretatik 1 gure artean dago 2003tik osasun arazoak direla eta, eta beste 2 ere Euskal Herrian geratuko dira. Eskuak erreta ditu batek eta atzeratua da bestea. Osakidetzaren bitartez beraien osasun egoera hobetzen saiatuko dira orain. Gainerako 16ak etxerako bidean dira jada. Gaur arratsaldeko hiru terdietan hartu dute autobusa Arrasaten, Bilbora joateko. Handik Tindoufera hegazkinez joango dira, eta behin hara iritsita kanpamenduetara eramango dituzte, zain dituzten lagun eta senitartekoengana.