Jakintzaren Gizartea indartzea du helburu bi erakundeek sinatu berri duten hitzarmenak, eta esparru honetan unibertsitateek funtsezko zeregina dutela uste du Gipuzkoako Foru Aldundiak.
Diru laguntza IKTen erabilera sustatuko duten proiektuak finantzatzeko erabiliko du MUk: azpiegiturak eta berariazko ekipamendu aurreratua finantzatzeko, hain zuzen ere. Noski, berrikuntza pedagogikoaren esparruan ere bere eragina izango du sinatu berri den hitzarmenak.
Hitzarmenaren helburuak
IKTen erabilera indartzea da hitzarmenaren helburu nagusia. Kudeaketa era berriak sustatzea ahalbidetuko du, esaterako enpresa eta unibertsitateen artean. Ez hori bakarrik, IKTen erabilera intentsiboan oinarritutako euskarri pedagogikoen garapena gauzatzeko aukera ere emango du. Irakaskuntza-ikaskuntza prozesuak hobetzeko pedagogia eta zientzia ikasketak sustatzea, besteak beste.
Bigarren hitzarmena
Ez da hau Foru Aldundiak eta MUk sinatzen duten lehen hitzarmena. 2003. urtean ere sinatu zen beste bat. Unibertsitatearen kudeaketan IKTen oinarrizko plataforma garatzeko egin beharreko inbertsioetarako kasu hartan. Bi erakundeek egindako balorazioaren arabera, aurreko hitzarmenean adierazitako helburuak behar bezala bete dira. Esperientzia on haren ildotik gauzatu da akordio berria.