Omenaldia ezbeharrez hil ziren Oñatiko bost gazteei

Auto-istripuz hil ziren Oñatiko lau gazteei eta mendian hil zen oñatiarrari omenaldia egin zieten atzo, ekainak 1, Mondragon Unibertsitatean. Hildako bost gazteen gurasoak, familiartekoak, lagunak, ikaskideak, Mondragon Unibertsitateko eta MCCko ordezkariak eta hainbat herritako alkateak bildu ziren atzo Goi Eskola Politeknikoan. Omenaldi hunkigarria izan zen eta malko artean egin zuten ekitaldia.

Mondragon Unibertsitateko Goi Eskola Politeknikoan ikasten zuten Ane Miren Telleria, Amaia Uriarte, Mikel Urtzelai, Aitor Oñate eta Aritz Azpiazuk. Hori dela-eta, MUko ikasle, irakasle eta gainontzeko langileek omenaldia egitea erabaki zuten.

Plaka bana jaso zuten gurasoek

18:30ean hasi zen ekitaldia, txalapartarekin. Aurkezpenaren ondoren, bertsoak kantatu zituzten bi ikaskidek, hildako gazteen omenezko bideoa eman zuten eta aurreskua egin zuten ikasle batzuek.

Hasiera hunkigarri horren ostean, hildako bost gazteen omenez eskolako lorategian landatutako zuhaitzaren inguruan jarraitu zuen omenaldiak. Oñatiko eta unibertsitateko koralek, bat eginik, abesti batzuk eskaini zituzten.

Bukatzeko, familiartekoei plaka bana eman zieten, hildako gazteen omenez.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.