Eliza Katolikoak erabaki du Mondragon Kooperatibari, San Silbestre Aita Santuaren agiria eta zilarrezko domina ematea. Aitormen hau laikoei zuzenduta dago. Hain zuzen ere, elizari eta ekintza katolikoari bultzada nabarmena eman izan diotenentzat.
Aitormena jasoko dutenak dira, Alfonso Gorroñogoitia, Jose Mª Ormaetxea, eta hilik dauden Luis Usatorre eta Jesus Larrañaga Fundatzaileen izenean, beren emazte Pureza Aranzabal eta Carmen Galdos.
Ekitaldia Arantzazun
Aita Santuaren aitormen-ekitaldia, Arantzazuko Santutegian izango da ekainaren 18an, larunbata. Joan Maria Uriarte Donostiako Gotzaina izango da ekitaldiaren buru, Jose Maria Setien lagun duela.
Lehendabizi, Eukaristia ospakizuna izango da Basilikan, goizeko 11:00etan. Ondoren, 12:15etan, agiri eta domina ezartze saioa izango da "Gandiaga Topagunea" izeneko eraikin berrian.