Oraingo honetan banatu dituzten elikagaiak dira arroza, arrozesnea, arroza lurruneztatua, gailetak, esnea, arrautzesneak, pasta eta gaztaia. Gurutze Gorriko Jabier Igartuak azaldu digunez, Europako Batasunean hitzartuta dago enpresek ekoizten duten jakien ehuneko bat gorde egin behar dela, elkartasunean banatzeko. Hortik ehuneko bat hirugarren mundura bidaltzen da, beste zati bat hondamendiak gertatzen diren tokietara eta beste zati bat Europako Batasunean bertan banatu behar da. Orain Gurutze Gorriak egin duena, azken zati horretako ekintza bat da.
Antzuolan 2 familiek hartu dute laguntza hori, Aretxabaletan 9k, Arrasaten 42k, Bergaran 34k, Elgetan batek, Eskoriatzan 14k, Leintz Gatzagan 4k eta Oñatin 21ek. Guztira, 127 familietako 268 lagunek hartu dituzte elikagaiak.
Udaletxeetako Gizarte Sailekin harremanetan
Jakiak nori eman erabakitzeko orduan, Gurutze Gorriko kideak Debagoieneko udaletxeetako Gizarte Sailekin jartzen dira harremanetan eta sail horietan dituzten datuak hartzen dituzte oinarri banaketa egiteko . Gero, jakiak batuta dituzten lokal batera joateko deia egiten diete laguntza egokitu zaien familiei, paketeak hartzera joan daitezen.
Maiatzean egin dute jakien banaketaren lehen zatia eta bigarrena urrian egingo dute seguruenik.