Hemen inguruko leku gehienetan, kablea erabiltzen dute Internet eskuratzeko. Baina leku edo bizilagun askok ezin dute hori egin, kablea ez delako behar den tokiraino iristen (ibarreko baserri asko daude egoera horretan).
Hala, bada beste sistema bat, kable gabekoa. Kasu horretan, uhinen bitartez bideratzen dute seinalea. Eta kablea iristen ez den leku askotara iristea lortzen dute uhinek.
Kelnara eta Goiena.net
Gauzak horrela, bide hori aprobetxatu eta Internet eta telefonia finkoa eskuratzeko aukera eskaintzen du gure ibarrean Arrasateko Kelnara enpresak. Hain zuzen ere, hori bideratzeko hitzarmena sinatu du oraingo astean Goiena.net-ekin. Horri esker, orain arte zerbitzu horiek eskuratu ezin zituzten Arrasateko, Aretxabaletako, Aramaioko, Eskoriatzako eta Gatzagako auzo eta baserri askok izango dute Internet banda zabalaren bitartez lortzeko aukera.
Goienak, berriz, hitzarmen horren bidez lortuko duena da sarearen bitartez bideratzen duten informazioa modu errazago eta bizkorragoan helaraztea, eta kablea iristen ez den lekuetara iristea.