Gau epela klimatologiari dagokionez, eta giro beroa euskararen alde. Debagoieneko errepide eta herriko kaleak jendez bete ziren euskarari bai esateko. Askotariko elkarte, alderdi politiko, sindikatu, kirol talde eta gizarte eragilek hartu zuten lekukoa.
Arrasaten Mundukidekoak eta presoen aldeko aldarrikapena
Kanpanzarretik behera kubatarrak, brasildarrak eta beste zenbait herrialdetako lagunak izan ziren protagonista Mundukideren truke programari esker. Arrasateko kaleetan, ostera, Jon Agirre presoa omendu zuten. Joxepa Arregik gurpildun aulkia eraman zuen zenbait metrotan, Jon Agirreren egoera salatu guran.
Aramaioko dantzariak protagonista
Arrasateko irteeran, Aramaiora bidean sekulako jendetza elkartu zen, milaka lagun euskararen eta korrikaren alde. Aramaion ere jende askok egin zuen bat festarekin, eta auzoetatik igarotzean babes handia jaso zuen. Aramaioko Dantza taldeko gazteek hartu zuten lekukoa Zabola inguruan eta Untzillarako bidean haiek izan ziren protagonista, eta Korrikako antolatzaileak oso gustura debagoiendarren erantzunarekin.
Aretxabaletan etxafuegoekin egin zioten ongietorria Korrikari
Araba ere euskararen alde! Oihukatu zuten Aramaio aldean. Aretxabaletan ongietorri beroa egin zioten Korrikari, Kurtzebarri eskolakoak Untzilla auzoan eta Arizmendi ikastolakoak Loramendin. Baina, gainera, elkarte gastronomikoak, alderdi politikoak, UDA kirol elkarteak eta beste zenbait lagunek ere hartu zuten euskararen aldeko lekukoa.
Jubilatuak protagonista Eskoriatzan
Gauza bera gertatu zen Eskoriatzan. Gauaren epelean irten ziren herritarrak kalera, tartean, Huheziko ikasle asko ere. Eta euskararen aldeko aldarrikapenak adinik ez duela argi utzi zuten Eskoriatzako jubilatuek.
Eskoriatzatik Leintz Gatzagarako bidea hartu zuen Korrikak, eta handik Araba aldera. Marieta, Ozaeta, Narbaxa eta Zalduondoko euskalzaleek hartu zuten debagoiendarren lekukoa.