Erabakia behin behinekoa da eta alda daiteke baldin eta premia larriagoa duen beste ikastola batek 2006ko martxoa baino lehen egingo balu eskaria. Baina, ondo bidean, Bergaran ospatuko da. Datorren urtekoa Oiartzunen antolatuko dute.
Kilometroak Debagoienean
Horrenbestez, bi urteko epean, Debagoienean antolatuko dute Kilometroak jaia. Aurten, jakina denez, Leintz aldean ospatuko da, Arizmendi Ikastolak antolatuta. Batik bat, Aretxabaletan barrena igaroko da ibilbidea.
Ibilbide laua
1991ko Kilometroak jaia ere Bergaran antolatu zuen Aranzadik. Orduan ez bezala, 2007. urtekoan ibilbide laua egin nahi dute eta, seguruen, trenbide zaharra erabiliko dute horretarako, Labegaraietatik Osintxuraino. 1991koan San Martzial ermita eta Zurragan barrenetik igaro zen ibilbidea.