Herrizaingo Saileko www.trafico.euskadi.net webgunean sartuz gero, ez dugu aurkituko Elgetari, Kanpanzarri, Leintz Gatzagari, Udanari, Elosuari edo Kurtzetari buruzko ezelako argibiderik. Ikusiko ditugun mendate bakarrak, Debagoiena ingurukoak, Arlaban eta Deskarga dira.
Errepide sareak nagusi
Herrizaingo Sailetik lehentasuna ematen dio errepide sare nagusiari eta bestea aipatu ere ez du egiten. Gainera, webguneak badu aukera herrialdeetan klikatzeko, lehen usteetan bertako argibide zehatzagoak jakiteko. Baina bertara sartuz gero, hutsik azaltzen da hurrengo orria. Eta hala dela baieztatu digute gainera Herrizaingo Sailean, bigarren mailako gure mendateei buruz, ez dugula argibiderik aurkituko bertan.
Bestalde, gogoratuko dugu Herrizaingo Sailak eskura jarri duela telefono zenbaki bat, errepideen egoerari buruzko informazioa zabaltzeko. 902 112 088 da telefono zenbaki hori eta hor bai, edozein mendateren gaineko argibideak emango dituzte.