Deskargan, Arlabanen eta Leintz Gatzagan izotz asko dago, eta arretaz gidatzea komeni da. Elgetan eta Kanpanzarren ere izotzaren ondorioz kontu handiz gidatu beharra dago.
Ibarreko errepide gehienetan izotza
Goizaldean arazo dezente eragin ditu izotzak lantokietako aparkalekuetan. Besteak beste, Aretxabaletako Coprecin auto askok arazoak izan dituzte aparkalekutik irtetzeko.
Aretxabaleta eta Arrasate artean zenbait izotz plaka daude, eta udaleko zein aldundiko beharginek gatza bota dute.
Bost gradu zero azpitik
Goizeko zazpietan bost gradu zero azpitik zeuden Aretxabaletan, eta hiru gradu zero azpitik Arrasaten. Tenperatura oso baxuak izan dira ibarreko herri gehienetan.
Debagoienean istripurik ez
Zorionez, baina, istripurik ez da izan Debagoieneko errepideetan. GI-627 errepidean auto ilarak gertatu dira, baina istripu aipagarririk ez.
Gipuzkoan, Araban eta Bizkaian arazoak
Goizeko arazorik larrienak A-8 autobidean izan dira, izotzaren ondorioz zenbait autok elkar jo dute eta auto ilarak gertatu dira Muskiz inguruan. Gipuzkoan eta Araban, berriz, zirkulazioan normaltasuna izan da nagusi.