Muted (Arrasate-abadiño)
Adituak esana / Unai Azkarate, musikaria
Metal oso neurtua egin dute, erritmo programatuekin. Giroa hotz samar zegoen, baina teknikoki, eta euren estiloan, oso talde ona da. Rammsteinen bertsioa desegokia iruditu zait, oso entzuna dago eta.
Ikusleek esana / Maider Arregi
Ez nuen talde hau ezagutzen, eta sekulako ezustea eman didate. Oso talde osoa iruditu zait, eta abeslariaren ahots bikainak harritu nau. Eszenaratzea oso ona izan da, eta musika aldetik ere onak dira. Akatsa da ez dutela publikoarekin hartu-emana bilatu.
Kazetariak esana / Leire Kortabarria
Oso emanaldi neurtua izan zen, neurtuegia akaso publikoarenganako berotasuna lortzeko. Hala ere, musika eta koreografia aldetik bikain aritu ziren. Primerako taldea da Muted eta gurean zabalkunde handiagoa merezi du.
Taldekideek esana
Ondo aritu gara. Gogor entseatu dugu honetarako eta gustura geratu gara. Urduritasunak beti du eragina, baina tira Pozik gelditu gara, izan ere, ez gara lehiaketa irabazteko ideiarekin etorri, gure kontzertua eskaintzera baizik. Beste bi finalistak oso maila oneko taldeak dira.
Sharon Stoner (Oñati)
Adituak esana / Unai Azkarate, musikaria
Stoner estiloan, sekulako kalitatea dute. Kantuak oso landuta dituzte eta hori igartzen da. Abeslariak erregistro asko ditu. Bateria-jotzailea ere oso ondo aritu da.
Ikusleek esana / Maider Arregi
Taldea ezagutzen nuen lehendik ere, eta banekien indartsuak zirela. Neuk gustuko dudan taldea da, izan ere, hiru kide besterik ez izateko, agertokia bete egiten dutela iruditzen zait. Emanaldi honetan ere gustatu zaizkit. Abeslariak ahots erakustaldi bikaina egin du eta publikoa zoratuta egon da eurekin.
Kazetariak esana / Leire Kortabarria
Talde txikia da kopuru aldetik, baina hazi egiten dira agertokian. Aditu ez direnendako, musika estiloa gogorregia izan daiteke. Hala ere, oso profesional jardun zuten eta, elkarren artean eta publikoarekin ere, primeran konpondu ziren. Oso irabazle duinak dira. Zorionak!
Taldekideek esana
Hasieran urduri geunden, eta akaso hotzago sumatu gaitu publikoak, baina gero gustura egon gara. Publikoa oso ondo portatu da. Finalera iritsiko ginenik ere ez genuen uste; hortaz, irabazteko aukerak bagenituela uste genuen, zergatik ez?
Potemkin (Oñati)
Adituak esana / Unai Azkarate, musikaria
Giro ona jarri zuten izugarrizko ikuskizunarekin. Gitarra-jotzailea ez zen beharrezkoa, baina oso ona zen. Abeslariak elektrizitatea transmititzen zuen; ahotsa, baina, apur bat urratuta zuen. Elvisen moldaketa borobila izan zen.
Ikusleek esana / Maider Arregi
Nire faboritoak ziren lehendik eta emanaldiaren ondoren ere. Irabazteko dena zuten: musika ona, taldekide esperientziadunak eta publikoarekin konexioa. Maila bikaina dute, Oñatiko beste taldeak bezala, lehiaketan ikusi denez.
Kazetariak esana / Leire Kortabarria
Indar handiarekin eta publikoari ondo pasarazteko asmoarekin irten ziren, eta lortu ere, lortu zuten helburua. Oso ondo komunikatzen dute, gertukoak dira, eta lortu zuten publikoa dantzan eta guzti jartzea. Musika eta instrumentu aldetik, primerakoak; gaueko talderik onena izan ziren.
Taldekideek esana
Sailkapen fasean baino hobeto ikusi dugu gure burua, askeago. Emanaldiak iraupen egokia zuen guretako: 45 minutuan, eroso sentitzeko eta gure maila emateko modua izan dugu.