Eskoriatzako eta Bergarako eragileek antolatu dituzte egitarau mardulenak. Biotan, panel bana ipiniko dute, herritarrek mezuak idatz ditzaten; Eskoriatzan, Herriko plazan izango da, eta Bergaran, Munibe plazan.
Eskoriatzan, Udalak, ikastetxeek, euskaltegiak eta ludotekak deitu dituzte ekintzak, bakoitzak bere aldetik edo batera egiteko, Esanak esan, euskara lelopean. Udaleko eta euskaltegiko langile eta ikasleek kartelak ipiniko dituzte, eta ikastetxe eta ludotekako umeek hainbat jolas eta denborapasa izango dituzte euskararen inguruan. Bukatzeko, Greban gaude antzezlana izango da unibertsitatean, 22:00etan.
Bergaran, Udalak, EHEk, Jardun elkarteak, AEKk eta ikastetxeek deitu dituzte ekitaldiok Euskara zabaltzia, denon konpromisua leloarekin. Ekintza gehienak Munibe plazan izango dira: 17:00etatik aurrera, umeendako txokoa; 19:30ean, Telesforo Monzon herriko semeari omenaldia egingo diote; gero, musika kalejirak, triki-poteoa eta afari merienda izango dira. Bukatzeko, Berriketan bertso eta kantu emanaldia izango da Pol-Pol tabernan, gauean.
Ikasle guztiendako boligrafoak
Horrez gain, beste herrietako ikastetxe askotan umeendako jolasak, ikastaroak, musika emanaldiak izango dira. Eta Debagoieneko ikastetxe guztietan boligrafoak banatuko dituzte euskara elkarteek, enborrean Euskara zabaldu leloarekin. Bestetik, Arrasaten, Herriko plazan, Euskal Herrian Euskaraz taldeak kontzentrazioa egingo du 12:00etan.
Xabierko San Frantziskoren omenez aitortu dute abenduaren 3a Euskararen Eguna.