Arrasate, Oñati eta Elgeta Eusko Jaurlaritzaren haurreskola partzuergoan sartu ziren, bere egunean. Ordutik, herriko lokal batzuk egokitzen aritu dira edo horretan daude, eta 2004-2005 ikasturterako gertu egongo dira. Hori dela-eta, matrikulazio epea astelehenean zabalduko da. Familia bakoitzak bere herriko udaletxean egin ahal izango du matrikulazioa. Maiatzaren 17tik 28ra bitartean izango da zabalik, eta ekainaren 21ean emango da aditzera onartutakoen izen zerrenda.
Oraingoz, Debagoienean, herri horietan bakarrik izango da matrikulatzeko modua. Antzuola ere lanean ari da bere haurreskola lehen bailehen ireki ahal izateko. Bergarak eskaria eginda du partzuergoan sartzeko. Aretxabaleta eta Eskoriatza ez daude partzuergoaren barne.