Bihar, apirilak 23, Liburuaren Eguna da, eta Debagoieneko hainbat liburutegik, Estatuko ekimenarekin bat egiteaz gain, herritarron artean kanpaina egiteko aprobetxatuko dute. Izan ere, ibarreko liburutegi batzuetan, ordainpeko maileguaren aurkako sinadurak bilduko dituzte, eta neurri horrek ekar ditzakeen kalteen inguruko informazioa ere banatuko dute.
Ibarreko liburuzainon ustez, liburua maileguan hartzeagatik ordaindu behar izatea oztopo handia izango da liburutegiondako. Irakurketa bultzatzea zaila bada, ordaindu behar izanez gero, are zailagoa izango da, dio ibarreko liburuzain batek.
Ekimen hori oso hedatua dago Estatuan. 300 idazletik gora izenpetu dute manifestua.
Liburuaren Eguneko ospakizunak
Hori da aurtengo berrikuntza; baina, aurreko urteotan bezala, liburutegiok hainbat ekintza berezi antolatu dituzte Liburuaren Eguna ospatzeko. Esaterako, gaur, Oñatiko liburutegian, Gerardo Markuleta idazlearekin solasaldia egongo da, 19:30ean.
Arrasate, Bergara eta Oñatin, bazkideok hainbat liburu doan eureganatzeko modua dute. Bestalde, umeendako irakurketa asteak ere antolatu dituzte hainbat lekutan, txikitandik liburutegia ezagutu dezaten.
Urtero bezala, bestalde, egubakoitzean Herriko Plazan egongo da Bergarako liburutegia. Liburuak, DVD-ak izango dira aukeran.