Elurragatik, aldaketak egubakoitzean
Egubakoitzean ikastetxeetako haurrak izan ziren mozorrotzen lehenengoak. Elurra zela-eta, hainbat plan bertan behera geratu ziren; ikastetxe barruetan edo estalitako eraikinetan ospatu zituzten Aratusteak eta ezin izan zuten kalean gora eta behera kalejiran ibili.
Hala, Bergarako, Oñatiko, Elgetako eta Antzuolako ikastetxeetako neska-mutikoak mozorrotuta irten ziren kalera.
Zapatuan, tabernaz taberna
Zapatuan ere eguraldi eskasa egin zuen, baina Bergaran eta Eskoriatzan giro polita egon zen gauean. Bergaran ez zuten aparteko berezirik antolatu, baina jende ugari ibili zen tabernaz taberna mozorrotuta.
Eskoriatzan, Aratusteak girotzeko lehiaketa antolatu zuten tabernendako. Inkernu tabernak irabazi zuen lehen saria.
Domekan, dantzak nagusi
Aratuste-domekan eguraldi bikaina egin zuen egun osoan, dantza egiteko egun paregabea izan zen. Antzuolan, txistularien kalejira eta Txarri eta Sorgin dantza egin zituzten goiz eta eguerdi partean, hartz eta guzti.
Aretxabaletan, giro bikaina egon zen, beste behin ere. Asteak eta asteak eman zituzten koadrilek mozorroak, karrozak eta abar prestatzen, eta ikusgarriak izan ziren domekakoak: piratak, troiarrak, Jamaikako rastafariak, Frantziako Iraultzako soldaduenak, sorginak... Denetarikoak ikusi genituen. Kintoek, berriz, Txino dantza egin zuten, azkeneko urteetan ohikoa bihurtu den moduan.
Martitzenean, ikasleak
Aratuste-martitzenean, kanpotik ibarrera ikastera etorritako unibertsitarioengatik batez ere, Arrasate nagusitu zen. Bergaran eta Eskoriatzan ere mozorrotu ziren gaztetxoak eta hain gaztetxo ez direnak. Giro bikaina izan zen guztietan ere.