Aretxabaletako, Eskoriatzako eta Arrasateko Herri Eskolek egin dute bereziki eskaera hori. Izan ere, herri horietako Udalek uko egin diote Herri Eskoletan 0-3 urte bitarteko zikloa jartzeko, Eusko Jaurlaritzak Eudelekin sortu zuen Haurreskolak Partzuergoari. Eusko Jaurlaritzako Hezkuntza Sailak azaroan sinatu zuen protokoloa Partzuergoa sortzeko, eta hor araututa gelditu da zein den Udalek nahiz Herri Eskolek jarraitu behar duten bidea, 0-3 zikloa sare publikoan eskaintzeko.
Eskaintza pribatua bakarrik
Goieskolak salatu du, gaur egun herri horietan 0-3 urteko zikloan dagoen eskaintza bakarra pribatua dela. Gainera, euren ustez, herri erakundeek erraztasunak ematen dizkiete eskola pribatuei, sare publikoaren kaltetan.
Goieskolak dio, Debagoieneko guraso askok hezkuntza publikoa nahi dutela hasiera hasieratik euren seme-alabendako, baina sare publikotik kudeatuta. Hori dela eta,Goieskola Elkarteak deia zabaldu die herri erakundeei, bilera egiteko eta irtenbideak aurkitzeko, datorren ikasturterako Debagoieneko herri guztietan 0-3 zikloa sare publikoan ere sar dezaten. Goieskolaren ustez, bide bakarra Partzuergoa da.