Ezusterik ez bada behintzat, Jaurlaritzaren erantzuna baiezkoa izango dela esan daiteke, hau da, uste guztien arabera, hezkuntza sailak baiezkoa eman die Arrasatek, Oñatik, Aretxabaletak eta Eskoriatzako udalek, 0-3 urte bitarteko eskaintza publikoa antolatzeko proposatu duten formulari.
Arrasateko udalarekin harremanetan jarrita, aste honetan Jaurlaritzak emandako erantzuna publiko egingo dutela esan digute, azken egunotan aurkeztutako formularen inguruko azken xehetasunak lotzen ari baitira. Hortik pentsa daiteke Jaurlaritzak baiezkoa eman duela.
Horren arabera, lau herrietan: Arrasate, Oñati, Aretxabaleta eta Eskoriatzan, herri bakoitzean 0 eta 3 bitarteko umeendako eskolak antolatuko dira, eta enpresa edo talde bat arduratuko da horren gestioarekin. Talde hori zein izango den jakitea falta da, eta horren berri aste honetan jakingo dugu, adostasunik lortu badute behintzat.
Bestalde, Goieskolak, Debagoieneko eskola publikoak batzen dituen elkarteak prentsaurrea deitu du eguenerako, eta prozesuaren inguruko argibideak emateko.