Bergarako Txistularien bandaren eta Estanga anai-arreba trikitilarien doinuekin dantzatuko dute lehiakideek. Euskal Dantzari Biltzarrak izendatutako epaimahaikideek behatuko dituzte dantzatuko dituzten sei pausoko fandangoa eta sei pausoko arin-arina –Esti Urrutia, Ane Anza, Karlos De las Heras eta Katerin Artola–.
Lau sari banatuko dituzte guztira: Udalak emandako garaikurra, txapela eta 220 euro bikote irabazleari; bigarren saridunari garaikurra eta 200 euro; garaikurra eta 180 euro hirugarren bikote irabazleari; eta jantzi egokiena ere sarituko dute, garaikurrarekin eta 120 eurorekin; sariez gainera, bikote guztiek 100 euroko dieta jasoko dute.
Eskolakoen koreografia
Txapelketaren bukaeran, Bergarako Musika eta Dantza Eskolako 9 eta 12 urte arteko dantzariak igoko dira taularen gainera, eta Eñaut Elorrietaren Zapalduen olerkia kantu ezagunarekin sortutako koreografia egingo dute, herriko dantza-harrobiaren erakusle izango dena.