Kutxa Fundazioko patronoek atzo, eguena, egindako saioan berretsi dute patronatuaren aldaketa. Modu horretan, Fermin Lazkano bergararra izango da presidentea datozen lau urteetan. EH Bilduk proposatutako hautagaia izan da, EAJren eta PSE-EEren adostasunarekin. Era berean, Miren Azkarate izango da lehen presidenteordea eta David Garcia, bigarren presidenteordea.
Fundazioak nabarmendu du kudeaketa ekonomiko-finantzarioa, enpresa-kudeaketa, esparru akademikoan, kulturalean eta instituzionalean eta interes publikoko ekimenak garatzen ibilbide luzea dutela hiru horiek.
Lazkanori dagokionez Kutxa Fundazioan urte luzeko ibilbidea garatu du, eta 2022az geroztik da patronatuko ordezkari. Bestalde, fundazioko makina-erremintako formakuntza teknikoan aritu zen 2008tik 2022ra arte. Arlo politikoan, 2023ko udal hauteskundeetan EH Bilduko zerrendaburu izan zen Elgoibarren.