Talde bat 10:00etan elkartu da Agorrosinen oinez, Mekolaldera joateko, eta gainontzekoekin 11:00etan elkartu dira Mekolalden bertan bisita hasteko. Baserria zena bulegoetarako dago aprobetxatuta eta han daude esaterako, kontrol gela eta laborategia. Kontrol gelan hasi dute bisita eta ur zikinak garbitzeko prozesua eta plantari buruzko xehetasunak eman dituzte Iker Ibarrak eta Aitor Irizarrek. Laborategia bisitatu ondoren, plantan barrena ibili dira, xehetasunak bertatik bertara ezagutzeko.
2009tik dago araztegia Bergarako Mekolalde auzoan, eta, gaur egun, Bergarako, Osintxuko eta Antzuolako ur zikinak garbitzen ditu; gaur adierazi dutenez, egunero-egunero 3 milioi litro ur zikin garbitzen dira plantan. Elgeta falta da sisteman sartzeko, baina azaldu dutenez proiektua dagoeneko aurkeztuta dago, eta espero dute lanak datorren urtean esleitzea.