Musika Bandak urtean zehar askotariko kontzertuak egiten ditu; kalekoak, didaktikoak... bakoitzean, kontzertu motari egokitutako errepertorioarekin. Urriko honetan, baina, errepertoriorik "potenteenetakoa" eskaintzen dute. "Urtean hiruzpalau kontzertutan bakarrik izaten dugu hilabete entseatzeko; urrikoa da horietako bat, eta, horregatik, zailtasun handiagoko errepertorioa eskaintzen saiatzen gara. Igandekoa halakoa izango da; pieza oso gogorrak dira batzuk, eta musikariak gogotik ari dira lanean", dio Enrike Txurruka zuzendariak.
Sei pieza
Salvador Giner konpositorearen L'entrà de la Murta pasodoble valentziarrarekin hasiko dute kontzertua. Ondoren, Carl Maria von Weberren Oberon operaren obertura joko dute; pasarte oso arinak dituena. Jarraian, Jesus Guridiren La Meiga zarzuelaren intermedioa eskainiko dute; galiziar kutsuko pieza arina. Samuel R. Hazoren Southern Hymn izango da hurrengoa, giro lasaiagoa eta goxoagoa ekarriko duena. Abenturazko musikaren txanda iritsiko da gero, Jose Alberto Pinaren The Legend of Maracaibo piezarekin. Azkenik, Thomas Dossen Firework joko dute, pop ukituko pieza alai eta argitsua.