10 kilometroko lasterketa izango da aurten ere. Soraluzen hasiko da proba, eta Bergarako San Martin plazan amaitu. Korrika egiteaz gain, patinetan, aulki gurpildunean eta handbikean parte hartzeko aukera izango da.
Izen-ematea zabalik dago; urriaren 30era arte eman ahal izango da izena, Kirolprobak.com webgunean. "Dortsalak, urtero bezala, Bergarako Seminarixoan banatuko dira, lasterketa egunean bakarrik", azaldu du Eneritz Urrutiak, Antxintxika taldeko kideak.
Bi eguneko egitaraua
"Aurten, bi eguneko egitaraua daukagu, 20. urteurrena denez, ospatzeko", azaldu du Urrutiak. "Aurten urteurren berezia denez, egubakoitzean ekitaldiak egongo dira, mahai-inguru bat egongo da Doituren eta Aikeren eskutik, eta, urtero bezala, zozketak ere izango ditugu".
Horrez gain, lehen aldiz social run bat egingo dute. Seminarixotik abiatuta, ibilbidearen zati bat egingo dute, iazko irabazleek gidatuta: Xabi Labaka eta Ainara Uribarri. Beste berrikuntza bat kuadrillen parte-hartzea izango da. Izan ere, aurten taldeka eman ahal izango da izena, eta hiru modalitate izango ditu: gizonezkoena, emakumezkoena eta mistoa.