68 greba egun daramatzate Bergara eta Zarauzko IATko langileek eta goizean egin duten prentsaurrekoan azaldu dute enpresak ez dituela aintzat hartu langileen aldarrikapenak. "Enpresarekin bilera izan genuen uztailaren 23an Donostiako Lan Harremanen Kontseiluan, negoziaketa desblokeatzeko asmoz langile ordezkariok deituta. Bilera horretan gure aldarrikapenak ez ziren kontutan hartu, enpresek entzun ere ez baitzituen egin, eta egoera larritzen doa", zioen Rober Gomez LABeko ordezkariak.
Gehitu du greban dauden langile batek kaleratze-gutuna jaso duela, eta beste 7rek enpresaren aldetik salaketak jaso dituztela. Enpresari eskatu diote emandako pausu horiek atzera botatzeko, bestela ez dela akordiorik egongo.
Mobilizazioak datozen egunetan
Uztailean hasi zen gatazka eta luzatzeak ondorio larriak eragin ditzakeela ohartarazi dute. Bergaran eta Zarautzen zerbitzua ematen ari ez direnez, inguruko herrietako IATak kolapso egoerarantz doaz: "Horrela jarraituz gero, ezinezkoa izango da herritarren segurtasuna behar bezala bermatuta egotea".
Aurreratu dute hurrengo bilera eguenean egingo dutela, baina dagoeneko iragarri dute manifestazioa egingo dutela irailaren 24an Bergaran, Irala kaletik hasita, 19:00etan. Parte hartzera deitu dituzte herritar guztiak. Urriaren 1ean, berriz, Zarautzen. Era berean langileei babesa emateko eta Eusko Jaurlaritzan aurkezteko sinadura bilketak jarri dituzte martxan; Bergaran IAT aurrean sinatzeko aukera egongo da. "Zerbitzu publikoa den heinean Eusko Jaurlaritzari dagokion erantzukizuna hartzeko eskatzen diogu".