Denera, 40 zeramika pieza inguru egokitu dituzte, hamazazpi egilek egindakoak. Tartean, eskulturak, muralak, tazak eta platerak aurki daitezke. Elkarteko kideen arabera, aurtengo erakusketak badu berrikuntza bat, egileen izena ez jartzea erabaki dutela, alegia, "hastapenetan daudenei bultzadatxoa emateko eta erakusketa soilik Buztinzale Elkartearen izenean egiteko".
Ikastaroa urritik aurrera
Iazko ikasturtean bezala, aurtengoan ere zeramikaren munduan murgildu gura dutenek urritik ekainera bitarteko saioak izango dituzte eskura, Pott Keramika tailerreko artisauek zuzenduta. Saioak Bergarako Buztinzale elkartean garatuko dira astelehenetan, 17:30etik 19:30era. 18 urtetik gorakoek hartu ahal izango dute parte. Prezioa ikasle kopuruaren eta hilabetean egiten diren saioen araberakoa izango da. Hamabi laguneko taldea osatuko balitz, bazkideek orduko lau euro ordainduko lukete, eta bazkide ez direnek sei euro. Izen-ematea, buztinzaleak@gmail.com-en.