Ikusteko dago datorren domekak zer emango duen, baina Arraun Lagunakeko neskek eman dute lehenengo kolpea. Eta kolpe handia izan da, gainera. Nerea Agirrezabalek eta haren taldekideek hasieratik atera die aldea aurkariei, eta denboraldian zehar Ligan erakutsitako nagusitasuna Kontxan berretsi dute.
Hala, datorren asteko estropadako txandak erabakita geratu dira. Lehen txandan, Hibaika, Donostiarra, Zarautz eta Orio ariko dira. Bigarrenean, aldiz, Arraun Lagunak, Tolosaldea, San Juan eta Astillero.
Portuan, gertukoak zain zain
Garaipenaren ostean, Donostiako portura itzulita, Arraun Lagunakeko arraunlariek ingurukoekin ospatzeko aukera izan dute, eta, Agirrezabalek, gainera, Bergaratik joandako gertukoak zituen zain. "Oraindik ez dugu ezer egin, datorren domekan gaur lortutako abantaila baliatu beharko dugu baina egia da 9 segundo abantaila polita dela. Berotzen hasi garenean ikusi dugu erritmo ona geneukala, eta estropadan berretsi dugu hori", adierazi dio GOIENAri bergararrak.
Gaurko sailkapena:
1. Arraun Lagunak: 10:49.68
2. Tolosaldea: 9.18ra
3. San Juan: 10.54ra
4. Astillero: 10.74ra
5. Hibaika: 12.72ra
6. Donostiarra: 13.26ra
7. Zarautz: 17.08ra
8. Orio: 18.46ra