Denboraldi bikaina osotu du Arriortuak. Uztailean, Espainiako Errepideko Txirrindularitza Paralinpikoko bi tituluak irabazi zituen Melillan –erlojupekoa eta errepidekoa–; Espainiako Pista Txapelketetan, hiru urre lortu zituen; eta maiatzean Euskadiko Txapelketa ere irabazi zuen.
Arriortuak ez du lehenengo parte hartzea izango Munduko Txapelketa batean. Iaz, Ronsen –Belgika– podiumetik postu bakarrera gelditu zen erlojupekoan, eta seigarren amaitu zuen ordekako proba. Urtebete lehenago, Zurichen, emaitza hobeak eskuratu zituen: Zilarra eskuratu zuen errepideko proban eta brontzea erlojupekoan. "Bi probak dira urteko erronka nagusiak, 2028ko Joko Paralinpikoei sailkapenerako funtsezko puntuak ematen dituztelako. Ordekako proban lehian izatea espero dugu, hori baita gure helburu nagusia. Erlojupekoan, berriz, podiumetik 32 segundora sailkatu ginen azken Munduko Kopan; emaitza txarra ez bada ere, aldea nabarmena da. Horregatik, erlojupekoa trebatzen saiatu gara, eta ilusioarekin egingo diogu aurre", adierazi du Arriortuak.
Hala, domina bat lortzeko faboritoen zerrendan dago aurten ere Arriortua. Oraingoan, Aristi txirrindulari profesional ohiaren laguntza izango du. Izan ere, Euskadi Fundazioaren txirrindularitza egokituaren egitura berria osatzen dute biek.