Atzo amaitu ziren Birminghameko atletismoko Europako txapelketak; ohikoa den moduan, errelebo lasterketetako finalekin. 4x100 metrotako final mistoan izan zen, hain zuzen, Andoni Calbano, Espainiako selekzioarekin lehiatzen.
Atzokoan, gainera, Espainiako selekzioak estreinaldia izan zuen diziplina horretan Europako txapelketa batean eta ederto moldatu zen, Crespik, Perezek, Bestuek eta Calbanok osatutako laukotea. Bergararra taldeko hirugarrena izan zen testigua hartzen eta azken erreleboa egin zuen Bestueri, esku-eskura utzi zion brontzezko domina.
Errekorra eta sari potoloa
Espainiako errekorra ontzea ere lortu zuen laukoteak, 40,42 segundoko denbora eginda. Horrenbestez, datorren urtean Pekinen jokatuko den Munduko Txapelketan egoteko txartela ere eskuan du Espainiak. Proban garaipena lortu zuen herrialdea Erresuma Batua izan zen, 39,97 segundotan gelditu zuten kronoa, Europako errekorra lortuz eta beste maila batean daudela erakutsita. Alemania sailkatu zen bigarren, 40,11 segundoko denborarekin.