Emanaldiak J.S. Bach-en, Cesar Franck-en, Jean Langlais-en, Dufourcet-en eta Hakim-en lanak izango ditu oinarri. Olmar Elejagaren parte-hartzea ez da kontzertu osoan zehar izango, baizik eta programako obra jakin batzuetan. Dantzariak azaldu duenez, haren lana "pieza batzuk dantza bidez laguntzea izango da, mugimenduak musikarekin elkarrizketa sor dezan eta esperientziari ikus- eta emozio-dimentsio berri bat eman diezaion".
Konfiantzan sortzeko aukera
Dantzariak azaldu duenez, organistek aukeratutako obra berezietan oinarritu du proposamen koreografikoa. "Organistek oso pieza bereziak eta zainduak aukeratu dituzte, eta horien gainean eraiki ditut proposamen koreografikoak", adierazi du.
Naji Hakim eta Marie-Bernadette Dufourcet organistekin egindako lankidetzari dagokionez, Elejagak sormen-askatasuna nabarmendu du: "Sormen-askatasun osoa izan dut, eta hori benetan eskertzekoa da. Konfiantzatik sortzeko aukera izatea opari handia da". Aukeratutako musikatik abiatuta, "dantzak musikarekin nola hitz egin zezakeen" irudikatzen saiatu dela azaldu du, "denak zentzua eta emozioa izan zezan".
Ezohiko esperientzia
Publikoari eskaini nahi dioten esperientziari buruz, dantzariak adierazi du "ohikoa ez den esperientzia bat" bizitzeko aukera izatea espero duela: "Gustatuko litzaidake une batez gelditzea, hunkitzea eta bi diziplina horien edertasunak eramaten uztea". Dantzak organo-kontzertuari beste begirada bat eskaintzen diola uste du Elejagak. "Mugimendua, emozioa eta begirada berri bat eransten dizkio obrari; entzuten denaren eta ikusten denaren arteko elkarrizketa sortzen da". Haren esanetan, helburua ez da musika ordezkatzea, baizik eta "esperientzia aberastu eta harekin konektatzeko beste ate bat irekitzea".
Espazioak garrantzia
Bergarako San Pedro elizaren espazioak ere protagonismo berezia izango du proposamen artistikoan. Elejagaren hitzetan, "nortasun eta edertasun handiko lekua da", eta "sinbolismo berezia duen espazioa, eta horrek giro aparta emango dio kontzertuari". Azaldu duenez, koreografia espazioaren ezaugarrietara egokitu behar izan dute, baita emanaldiaren parte izango diren bestelako elementuetara ere: "Pantailara, esaterako, dena modu naturalean integratzeko eta ikusleari esperientzia bateratu eta zaindua eskaintzeko".