BKEko futbol sailetik ekonomikoki saneatuta daudela nabarmendu zuten, baina aurretik dituzten erronkei heltzeko diru-iturri berriak behar dituztela gaineratu. "Arlo askotan profesionalizaziorantz goaz: prestatzaileak, fisioterapeuta eta masajistak, administrazioaz arduratzen direnak... Haiek ordainsaria jasotzen dute, eta klubeko entrenatzaileek ere prestakuntza behar dute. Hala, jendea baldintza onean izan nahi dugu. Eta, horrez gain, mutualitatea eta beste zerbitzu asko garestitzen ari dira, bizitzaren beste arlo asko bezala", adierazi dio GOIENAri Iosu Elorza presidenteak.
Horri aurre egiteko, batzarrean 415.000 euroko aurrekontua onartu zuten. Hala, %10 igoko dituzte Futbol Eskoletako kuotak –180 euro urtean–, eta baita jokalarien federatu kuotak ere –325 euro urtean–: "Familientzako esfortzua da, baina, nik dakidanez, Debagoieneko klubetan hori zaintzeko ahalegina egin izan da beti. Alegia, Bizkaian eta Donostiako klubetan futbolean jokatzearren familiek hemen baino gehiago ordaintzen dute. Hemen diru-iturriak lortzeko ahalegina egiten da zuzendaritzen partetik, askotariko ekimenak antolatuta. Beste leku batzuetan familien gain jartzen dituzte gastu guztiak".
Bergarako kluba 610 lagunek osatzen dute; besteak beste, 325 jokalari eta 53 entrenatzaile dituzte
Bergarako kluba 610 lagunek osatzen dute, 325 jokalari federatu dituzte, 53 entrenatzaile, 189 partaide, eta Futbol Eskolan 28 begirale daude. Hala, datorren denboraldian hamazortzi talde federatu izango dituzte, eta hogei talde Futbol Eskolan.
Berdintasunaren alde
Kirol arloan emakumezkoen talde nagusiak eman ditu poztasun handienak, Euskal Ligara igo dira eta. Eta aspaldiko eskakizunetako bati erantzuna emateko ahalegina egingo du BKEk: "Gizonezkoen eta emakumezkoen taldeak baliabide aldetik parean jarriko ditugu. Esaterako, denboraldian zehar kirol helburu batzuk zehaztuko dira, eta horiek lortuz gero izango diren pizgarriak edo ordainsariak berdinak izango dira. Eta baita klub barruko zerbitzuen erabilpena ere; arropa garbitegi zerbitzua eta materialaren erabilera, esaterako". Horrekin batera, ez bateko eta ez besteko jokalariek ez dute federatuta egoteagatik dirurik ordainduko.
Gizonezkoei dagokienez, ziklo aldaketa izango da, eta Iñaki Mardarasek hartuko du talde nagusiaren ardura: "Urtea ondo hasi zuten, baina Gabonetan dinamika txar batean sartu zen taldea eta kosta egin zitzaien egoerari buelta ematea. Tira, lau urte igaro eta gero ziklo aldaketak normalak izaten dira, eta komenigarriak".
Kirol instalazioak berbagai
Agorrosingo berdegunea berritu bazuten ere, zelaiaren bueltan dauden instalazioak zaharkituta daudela nabarmendu zuten batzarrean: "Ez da gai berria. Duela hamaika urte zuzendaritzan sartu ginenean argi geneukan instalazioei buelta bat ematea ezinbestekoa zela. Zelaia berritu zen, baina egia da aldagelen gaiak bere horretan jarraitzen duela, eta harmailak ere negargarri daude. Zaharkituta daude, ez dira batere irisgarriak... Ez dira instalazio duinak. Baina, ikusten ari garenagatik, Udalak beste lehentasun batzuk ditu. Halako batean, norbaitek heldu beharko dio kontuari". Batzarrean adierazi zutenez, Udalak eta klubak konpromisoa hartu dute Agorrosingo bigarren faseko proiektua berriz diseinatzeko. Proiektuak harmailak eta aldagelak hartuko ditu, eta urtea amaitu aurretik aurkeztu nahi dute, kirol instalazioak berritzeko Foru Aldundiak zabalduko dituen dirulaguntzetara aurkeztu ahal izateko.