San Pedro elizak hitzordu berezia hartuko du domeka arratsaldean. Bergarako Orfeoiak eta Donostiako Luberri abesbatzak Arimen besarkadan izeneko kontzertua emango dute; Aitor Biain-Bidarte eta Junkal Guerrero zuzendarien gidaritzapean eta Ignacio Arakistain organo-jotzailearen laguntzarekin. Kontzerturako sarrerak 10 euroan daude salgai, Bergarako Udalaren webgunean.
Guztira 75 lagun igoko dira oholtzara: bi abesbatzetako kideak, 40 musikari, hiru bakarlari eta organista. Azaldu dute kontzertuak espiritualtasuna, oroimena eta maitasuna izango dituela ardatz.
Lehen zatian, John Rutter konpositore britainiarraren musika korala izango da protagonista. Bigarren zatian, berriz, Junkal Guerreroren Arimen besarkadan obra osoa interpretatuko dute. Lanak doluaren, galeraren eta maitasunaren iraunkortasunaren inguruko hausnarketa proposatzen du, zazpi ataletan zehar garatzen den "ibilbide emozional" baten bidez.
Ikus-entzunezko baliabideak
Kontzertuaren beste berezitasunetako bat ikus-entzunezko baliabideen erabilera izango da. Elizan instalatutako pantaila handiek eta hainbat kamerak aukera emango diete ikusleei interpretazioa gertutik jarraitzeko, zuzendarien lana, abeslarien adierazkortasuna eta musika xehetasun handiagoz ikusteko.
Bihar arratsaldean Donostiako San Vicente Elizan emanaldi berdina eskainiko dute, 19:00etan.