Azken urteetako ohiturari jarraituz, ekainaren 23an ospatuko da solstizio gaua, Xaxauk, Jardunek, Bergarako Musika eta Dantza Eskolak eta Udalak antolatuta. Plazako lanen ondorioz, Seminarioko patioan izango da ekitaldia, eta, 21:00etan hasita, desiren mahaia jarriko dute. Ekitaldi nagusia 22:30ean hasiko da: suaren errituala eta sorgin-dantza egingo dituzte.
San Juan auzoan, jaiak
San Juan Egunarekin batera ospatzen dituzte festak San Juan auzoan, eta ohiko egitaraua antolatu dute. Martitzenean, eliza eta santua apainduko dituzte loreekin, 18:00etan. Suziria 21:00etan botako dute, eta, ohi bezala, San Juan suak egingo dituzte baserrietan.
Eguaztenean, berriz, ekainak 24, 12:00etan, meza egingo dute, erretiratuen abesbatzarekin, eta, ostean, luntxa izango da, herriko trikitilariek lagunduta. 13:00etan, lore-sorta erakusketaren txanda izango da, eta parte hartzen dutenek ohitura zaharrak kontuan eduki beharko dituzte lore-sorta egiterakoan. Bi sari banatuko dituzte parte-hartzaileen artean. 13:15ean, auzoko 80 urtez gorakoak omenduko dituzte, eta 14:30ean, auzotarren bazkaria egingo dute, Tartufo jatetxean.