140 lagun bertaratu ziren ostiral iluntzean Seminarixora, Harria taldearen azken uzta zuzenean ikusteko gogoz. Aitor Aldanondo taldekideak "gustura" aritu zirela komentatu du, nahiz eta lehen diskoaren aurkezpenean baino jende gutxiagoaren aurrean jo: "Estreinako lana rockeroagoa zen eta bazituen hainbat hit, publikoarengana iristeko errazagoak. Udazkenean atera genituen kantuek gehiago dute folketik, motelagoak, lasaiagoak dira; akustikoak, gitarra elektriko batzuekin. Beharbada horregatik iritsi gara entzule gutxiagorengana. Baina jaso dutenek oso ondo baloratu dute, baita guk ere. Nire ustez, lehen diskoa –Harria– baino hobea da Hemen diskoa".
Estilo aldaketa zuzenean defendatzea zertxobait kosta zaiela ere onartu du, baina, "engrasatzen" joan ahala, puntua hartu diotelakoan dago: "Emanaldi erdia nahiko folk izaten da, eta beste erdia nahiko rock".
Datorren astean Montblanc-eko (Katalunia) jaialdi batean jo, eta atseden hartuko dute uda ostera arte.
Bideoan, Argi izpi bat kantua.
