"Iaz, izen-ematea txikia izan zen, eta proba ez egitea erabaki genuen. Hala ere, arazo horiek iaz bakarrik izan genituen, eta aurten normaltasunez egingo dugu Triatloi Txika", esan du antolakuntzan dabilen Eneritz Urrutiak.
Hala, bakarka edo taldeka probatu ahalko dute gaztetxoek triatloia; bakarka doazenek hiru kirolak egingo dituzte, eta taldeka doazenek, kirol bana, edo batek bi eta besteak bakarra.
Bizikleta-gune motzagoa
Bergarako Udal Igerilekuan egingo dute igeriketa; txikienek 50 metro egingo dituzte, alebinek 100 eta infantilek 150. Bizikletan egingo dutena, aurreko urteetakoarekin alderatuz, motzagoa izango da: kiroldegiko boxetatik Biciprecision Igartuara joan-etorria egingo dute. Benjaminek bi kilometro egingo dituzte eta gainontzekoek, lau. Azkenik, futbol zelaian egingo dute korrika; adinaren arabera, bira bat, bi edo lau emango dizkiote zelaiari.