Lehenengo hitzordua bihar, izango da. Sergio Izquierdo Bebete egileak La hija del Verdugo komikia aurkeztuko du, Gregorio Mayoral Sendino Burgosko borreroaren inguruko lana. Komikiak Gregorio Mayoral Burgoko borreroa izan zenaren figura jorratzen du, Valentina bere alabren kontakizunen bidez. Aitaren lanbideak eta amaren galerak markatutako bizitza azaltzen da obran "garrote zitalaren" itzalpean bizi zen familia baten ikuspegitik.
Gregorio Mayoral 1890 eta 1928 artean Burgosko Auzitegiko borrero titularra izan zen. Aitona ezizenez ezaguna, lau hamarkadatan 60 pertsona exekutatzera iritsi zen; tartean, Michele Angiolillo anarkista italiarra. Antolatzaileen arabera, komikiak proposatzen du "aldi berean aldaratzen eta erakartzen duten pertsona ilun eta kezkagarrien" inguruko hausnarketa.
Sergio Izquierdo egile konprometitua eta balioaniztuna dela azpimarratu dute antolatzaileek. Komiki-gidoilaria izateaz gain, kazetari alternatiboa, irrati-esataria eta Bigarren Hezkuntzako Historioa irakaslea ere bada. Frantzian eta Polonian aritu izan da irakaskuntzan, eta Polonian 2010eko irakasle onenaren saria jaso zuen. Komikiaren marrazkiak Javier Martinez Sanchorenak dira.
'Literatura y revolución'
Bigarren aurkezpena datorren eguaztenean izango da, maiatzaren 20an, 19:00etan. Mariano Pachecok Literatura y revolución. Ensayos argentinos lana aurkeztuko du. Liburuak Argentinako literaturaren eta politikaren arteko harremana aztertzen du, eta galdera nagusi bat proposatu: Nola politizatzen da idazketa?
Saiakeran XX. mendeko hainbat egile eta korronte literario aztertzen dira; besteak beste Saer, Puig, Piglia, Fogwill, Gonzalez Tuñón, Viñas, Rozitchner eta Perlongher. Egileak literaturaren izaera politikoa hizkuntzaren lanketan, tradizioaren erabileran eta ahots kolektibo baten eraikuntzan kokatzen du, militantzia edo gai politiko hutsetatik harago.
Literatura kritikoa
Bi aurkezpenekin, memoria historikoa, literatura kritikoa eta pentsamendu politikoa uztartuko dira Bergaran. Angiolillo liburutegiak antolatutako hitzortduok solasaldirako eta hausnarketarako gune bihurtuko dute kartzela zaharra, eta literaturaren eta historiaren bidez gaur egingo eztabaidei begirada bat eskainiko die.