Ekitaldi hasieran, kongresuaren xehetasunak mamitu dituzte Laia Urretabizkaiak, Joseba Ugaldek, Maddi Urruzunok eta June Iartzak. Bost erronka aipatu dituzte: Ernai zentratu eta zabaltzearen erronka; gazte bulkada nazionala hauspotu eta indartzea; gazte borrokarako ekosistema elikatzea; gazteriaren nahi, behar eta kezkak politizatzea eta eztabaida politikoaren erdigunean kokatzea; eta gazteen artean aldaketaren aldeko espektatiba elikatzea.
Ondoren, Mikel Laboaren Martxa baten lehen notak abestia kantatu dute Ernaiko hainbat kidek:
Bi konpromiso ditu Ernaik
Aldaketaren garaia dela nabarmendu du Amaiur Egurrolak, Ernaiko bozeramaileak. "Aldaketaren aurrean, gazteok horren motor garrantzitsua gara, badugu indarra. Ikusi dugu Gazte Topagunean, 4.000 gaztetik gora elkartuta; ikusi genuen Donostiako mobilizazioan, Greba Orokorrean, eta Martxoaren 3an; eta ikusi dugu Korrikan. Ikusten dugu, halaber, egunez egun Ernain biltzen garen gazte bakoitzean. Euskal gazteria martxan da, eta prest dago herri honi behar duen bultzada emateko".
Era berean, gazte antolakundeak bi konpromiso berretsi ditu. "Batetik, Euskal Herria askatasunera eramateko konpromisoa berresten dugu. Garaiak eskatzen duen tamainako erreakzioa behar du herri honek, eta, gainera, galbidera doan munduan alternatiba bakarra dugu hau. Ernaik, urrats bat aurrera egin, eta askapen prozesuak eskatzen duen tamainako bultzada egiteko konpromisoa du".
Bestetik, Euskal Herriko gazteriarekiko konpromisoa nabarmendu du Egurrolak. "Gazte antolakundearen bokazio historikoa izan da gazteriaren nahi, behar eta kezkei erantzutea, alternatibak planteatzea, eta gazte zapaldurik gabeko Euskal Herria eraikitzea. Belaunaldi krisia nabarmena da gure belaunaldiko gazteen artean. Prekarietateak eta ezegonkortasunak eraginda, gazteok espektatibarik eta etorkizunerako heldulekurik gabe geratu gara. Horregatik, Euskal Herrian gazte oro duintasunez bizi dadin lan egingo dugu".
Azkenik, euskal hazteria "hamarkadetako borrokaren katebegi" dela gaineratu du Ernaiko bozeramaileak. "Behinola bidea urratu zutelako iritsi gara gaurdaino, eta horrela egindako urrats horiei esker garela. Hemen jaio zen Telesforo Monzon militante abertzale historikoa. Hark bultzatu zituen garai bateko utopikoak Euskal Herriaren askatasunaren alde borrokatzera. Gaur, mezu hori gure egiten dugu. Garaiak borroka eskatzen du".
Hamahiru urteko ibilbidea
Sortuko koordinatzaile orokor Xabi Iraolak ere hartu du berba ekitaldian, "halako egunak bizi izatea pozgarria" dela azpimarratuz. "Hamahiru urte hauetan Ernaiko kide izan garenontzat aitzakia ezin hobea da berriz elkar ikusi eta bizi izandakoa gogoratzeko. Baina benetan pozgarriena da aurrean daukadan argazki hau ikustea, ehunka gazte eta Bergarako frontoia beteta ikustea".
"Harro" azaldu da hamahiru urteotan Ernaik egin duen ekarpen politikoaz, "belaunaldi berriak askapen mugimendura batuz, diskurtso, praktika eta iruditegi berriarekin askapen mugimendua bustiz eta feminismoa praktika politikoaren erdigunera ekarriz", haren esanetan. "Harro nago hemen batutako guztiez, batzuek iraultza ikasten duten bitartean, zuek iraultza egiten ari zaretelako. Argi izan bide horretan gure konfiantza eta babes osoa daukazuela. Bidea zuekin egiteko konpromiso osoa daukagu".
Norabide aldaketa aldarri
Garai historiko "konplexu eta ezegonkorra" dela adierazi du Iraolak, norabide aldaketa aldarrikatuz. "Munduan gerra eta inperialismo aseezina zabaltzen ari da eta faxismoa hedatzeko arriskua erreala da. Fase historiko honetan, gure ardura botere, hegemonia eta gobernu anbizioz aritzea da. Are gehiago, ditugun aukerak ikusita; izan ere, dagoeneko, ezkerreko abertzale bat Ipar Euskal Herriko Elkargoko lehendakaria da. Nazio askapen mugimendua zerbait izan bada, agertoki politiko berriak imajinatu eta horiek posible egin dituena izan da. Orain ere, borrokatzen bagara, faxistak ez dira Euskal Herritik pasako eta lortuko dugu Euskal Herri aske, sozialista, feminista eta euskalduna eraikitzea".
Bide horretan, gazte antolakundeak "funtsezko rola" izan du, du, eta izango du, Iraolaren arabera. "Gakoa rol hori behar bezala identifikatzea da, dagokion misioaren jabe egitea. Nazio askapen mugimendua gara, urrutitik datorrena eta urrutira doana. Esperantza lapurtu nahi digutenen aurrean, gure herriaren etorkizuna izatea dagokigu".