Kirmen Uriberen liburua ardatz hartuta, literatur solasaldia izango dute eguaztenean. Asier Altuna Kixi zinemagile bergararraren Karmele filma nobela horren egokitzapena da, eta hura gonbidatuko dute solasaldira. Mikel Antza saioaren dinamizatzaileak adierazi du haren ekarpena "oso aberasgarria" izango dela. Azaldu du maiz liburua aitzakia izaten dela saio horietan, gizarteko gaiak mahaigaineratu eta elkarren artean ikuspegiak zein ekarpenak partekatzeko. "Beste liburu batekin itzultzen gara etxera" dio.
Solasaldira bertaratzeko, nahi duen ororentzat ateak zabalik daudela adierazi dute.