Aurten ere, argazkiak aurkezteko aukera izango dute Bergaran jaio diren, bertan bizi diren edo Bergararekin lotura duten herritarrek. Aurkeztutako irudiak Bergaran ateratakoak izan beharko dira edo, gutxienez, Bergararekin lotutako elementuren bat jaso beharko dute (paisaiak, pertsonak edo bestelakoak). Bergararekiko lotura argirik ikusten ez den kasuetan, argazkiek lehentasun txikiagoa izan dezakete aukeraketa-prozesuan, nahiz eta azken erabakia epaimahaiak hartuko duen.
Argazkiak aurkezteko baldintzak
Egile bakoitzak gehienez 25 argazki aurkeztu ahal izango ditu. Argazkiak formatu digitalean entregatu beharko dira, 20 x 30 cm-ko tamainan, 300 ppp-ko bereizmenean eta JPG formatuan. Artxiboak CD edo USB bidez aurkeztu ahal izango dira Udaleko Euskara Zerbitzuan, edo bestela posta elektronikoz bidali ahal izango dira euskara@bergara.eus helbidera, artxibo handiak bidaltzeko plataformaren bat erabilita (tori.eus, WeTransfer edo antzekoren bat). Egutegiaren formatuari jarraituz, argazkiek nagusiki formatu etzana izan beharko dute, nahiz eta formatu bertikalean ateratako argazkiekin osatutako multzo horizontalak ere onartuko diren.
Aukeraketa
Argazkien aukeraketa Udalak osatutako lantalde batek egingo du. Aukeraketa prozesuan genero ikuspegia kontuan hartuko da, eta ahalegina egingo da egutegian agertzen diren irudietan emakumeen eta gizonen presentzia ahalik eta orekatuena izan dadin. Egutegian erabiltzeko hautatutako argazkiak ordaindu egingo dira. Era berean, aukeratutako lanak Bergarako Udal Artxibategian jasota geldituko dira, eta Udalak horiek erabili ahal izango ditu etorkizunean, betiere egilearen izena aitortuta. Argazkilariaren ardura izango da beharrezko baimenak lortzea; argazkiak aurkezteak baimen horiek lortuta daudela ulertzea ekarriko du.