Erramu-zapatuko egitarauak ez du etenik izango bazkalostean. 17:30ean, Seminarioko patioan egingo dute arratsaldeko lehen ekintza, herri kirolen saio parte-hartzailea. Eguna borobiltzeko, berriz, Debagoieneko TAKE taldearen eta Zutik erromeriaren kontzertuak izango dira Munibe plazan, 20:00etan hasita.
Herri kirolak, berrikuntza
Herri kirolen saio parte-hartzailea izango da berrikuntza nagusia. Normalean, zezentxoak dira arratsaldeko protagonista, baina, Kultura zinegotzi Maite Usabiagak azaldu duenez, egitaraua antolatzen hasi zirenean indarrean zeuden dermatosi nodular kutsakorra prebenitzeko neurriek ezinezko egin zuten hura programatzea: "Feria antolatzen hasi ginenean, gaitz hura zela-eta ezin ziren zezen-ikuskizunak antolatu, eta beste aukera baten alde egin genuen".
Kuadrilla arteko olinpiadak izango dira saioaren ekintza nagusia, eta bertan, lau pertsonako hamar talde misto elkarren artean lehiatuko dira. Atzo itxi zen izen-ematea, baina, hala ere, probaldietan parte hartzeko aukera egongo da. Harri-jasotze eta aizkora erakustaldiekin bu- katuko da saioa.
Amaiera, musikarekin
Kontzertuak izango dira eguneko azken ekintzak. Bergarako, Oñatiko eta Arrasateko musikariek osatutako TAKE taldeak punk doinuak eramango ditu oholtzara. Amaitzeko, berriz, trikitiak izango du protagonismoa, Zutik erromeriarekin. Kontzertu horiek Korrika Kulturalaren baitan antolatu dituzte.