Bi egunetan parte-hartzaileek profesional espezializatuen azalpenak eta gomendioak jasoko dituzte. Lehenengo egunean, apirilaren 21ean, Osakidetzako erizain eta fisioterapeutek erorikoetan eragiten duten faktoreak azalduko dituzte; baita muskuluak indartzeko ariketak eta eroriko baten aurrean nola jokatu behar den ere.
Bigarren saioan, berriz, apirilaren 23an, Bergarako Kirol Zerbitzuetako teknikari batek jarduera fisikoaren onurez hitz egingo du, Udaleko Gizarte Zerbitzuetako langileek adinekoendako baliabide sozialen informazioa emango dute, eta Estella Farmazia Ortopediak laguntza material erabilgarriari buruzko azalpen praktikoak eskainiko ditu.
Erorikoak, Euskadiko istripuen bigarren heriotza kausa
Antolatzaileek adierazi dutenez, erorikoak dira gaur egun Euskadiko istripuen bigarren heriotza kasua eta 65 urtetik gorako pertsonen artean oso agertikoa den arazoa da: "Estatistiken arabera, adin tarte horretako pertsonen %30ek eroriko bat izaten dute urtean zehar, eta haietatik gehienak, %92, etxe barruan gertatzen dira. Datuek erakusten dutenez, prebentzio lan espezifikoa ezinbestekoa da adinekoen autonomia eta segurtasuna bermatzeko".
Ekimenaren helburua da adinekoei autonomia handiagoz eta segurtasun handiagoz bizitzen laguntzea, eguneroko jardueretan arriskuak murriztea eta eroriko baten ondorio fisiko eta emozionalak saihestea.