Martxoaren 28ko Erramu-zapatuko egitaraua berritasunekin dator. Udalak aurreratu duenez, legedia arazoak medio, arratsaldean ez da zezentxorik izango, eta horren ordez, 17:30ean hasita, herri kirol saio herritarra egingo dute –harri-hasotzea eta aizkolaritza– Seminarioko patioan, 12 urtetik gorakoendako, kuadrillen arteko olinpiada formatuan. Lau pertsonako talde mistoek eman dezakete izena galdetegi honetan.
Martxoaren 26an itxiko da izen-ematea, eta gehienez ere, 10 taldek hartu ahal izango dute parte. Alabaina, olinpiadetan izena eman gabe ere, egunean bertan, herritarrek aukera izango dute herri kirolak probatzeko. Bergarako Udaleko Kultura Zerbitzuan, kultura@bergara.eus helbide elektronikoan edo 688 76 34 91 telefonoan argitu daitezke zalantzak.
Forja lanak eta artile tailerra
Erramu-zapatuko ferian ere berritasuna izango da, goizean zehar, Sualai Forjakeko Iker Gabilondok Munibe plazan egingo duen forja lanei buruzko erakustaldia. Era berean, Nagore Intxausti artzain nafarrak San Plazan artilearen tailer parte-hartzailea egingo du.
Jardun Euskara elkarteak ere modu parte-hartzailean antolatu du txorimaloaren lanketa. Herritarren parte-hartzea eskatuko dute txorimaloa janzteko, Zuk zer ale emango zenioke euskarari? lelopean.
Azken sarrerak salgai
Erramu-zapatu bezperako bertsolaritza saioa izango da hilaren 27an, 20:00etan, Seminarixoan, eta azken sarrerak daude salgai Seminarixoko webgunean, zortzi eurotan. Beñat Gaztelumendi, Oihana Bartra, Julio Soto eta Ane Zuazubiskar igoko dira oholtzara eta Ibon Leibar Txinbo izango da gai-jartzailea.