Agurainen jokatu zituzten, atzo, emakumeen Binakako Txapelketa Nagusiko finalerdiak, eta Arrizabalagak eta Bergarak 22-14 menderatu zituzten Ruiz de Infante eta Mendizabal. Orain arteko partida guztiak nagusitasun handiz irabazitako bikoteak azken markagailuak irudika dezakeena baino lan gehiago egin behar izan zuen, ordea, Ruiz de Infante eta Mendizabalen defentsa gainditu ahal izateko, eta krisi unerik ere pasa zuen: bikote urdina 8-11 aurreratu zitzaionean, esaterako. Gorriek asmatu zuten, baina, momentu horretan atsedena eskatu, eta, bueltan, partidua euren alde jarriz berriz ere.
Gernikarrak eta bergararrak final handian aurkari izango dituzten Sagarduik eta Gamindek 12 tantotan utzi zituzten Aldai eta Arrillaga, atzo jokatutako finalerdietako bigarren neurketan.
Jendetza batu zen atzo Aguraingo pilotalekuan, eta Eibarren ere ikusmina sekulakoa izatea espero dute antolatzaileek.