Bestela ezin zitekeen moduan, kolore morea izan da gaur nagusi Martxoaren 8aren harira eguerdian Bergarako kaleetan egindako manifestazioan: morez apaindu dute mobilizazioaren buru joan den furgoneta; oihal more luze bat eroan dute hainbat gaztek pankarta nagusiaren atzetik; eta kolore bereko arropak eroan dituzte soinean ekimenarekin bat egin duten herritar askok.
San Martin plazan hasi eta bukatu da mobilizazioa. Amaieran, herriko hainbat kolektibo feministatako ordezkariek hartu dute hitza, besteak beste inperialismoaren kontrako egiteko; batez ere gazteek, pentsiodunek eta pertsona migratuek jasaten duten prekarietatea salatzeko; eta trans mugimenduaren kontrako jazarpena arbuiatzeko. Nebar musika taldearen emanaldiarekin bukatu da ekitaldia.