Badira lau urte Bergarako Udala herrian erroldatzen direnei harrera instituzionala egiten hasi zenetik. Osoko Bilkura aretoan ongietorri beroa emateaz gain, informazio praktikoaren berri ematean datza ekitaldia. Gorka Artola alkateak eta Ziortza Marzan Gizarte Zerbitzuetako zinegotziak gidatu dute harrera, hainbat hizkuntzatan zuzenduz bertaratutakoei. Euskaraz eta gazteleraz egin dute berba bereziki. Euren bizi esperientzia garatzeko eta herrian integratzeko tresna ugari dauzkatela eskura helarazi diete.
Bukaera aldera, banan-banan igo dira jatorri askotako herritarrak, eta bakoitzak bere jaioterria kokatu du munduko mapan. Aurreskua egin diete, eta Maite Aristegik bertsoa eskaini, euskal kulturaren keinu gisa. Talde-argazkia atera eta luntxa jatera joan dira, elkar hobeto ezagutzeko.
Hain zuzen, horixe bera izan da topaketaren helburua, Marzanen esanetan: "Askotan esaten da euskaldunak oso itxiak garela. Hortaz, izotza apurtzeko, elkar ezagutzeko, eta beharra dutenean gugana jotzeko erraztasun handiagoak izateko egiten dugu ekitaldi hau".
Oraindik badago zer hobetu
Azpimarra jarri du zerrenda ofizialetik kanpo geratzen diren pertsonengan: "Iazko 374 erroldatu berri horiek ez dute Bergarara bizitzera etorri direnen kopuru erreala islatzen. Kontziente gara batzuek ezin dutela izena eman, eta guretzat hori zailtasuna da, ez dugulako haien daturik. Baina zailtasun handiena eurek dute, egunerokotasunean asko eragiten dietelako, Osakidetzara joaterakoan, laguntzak eskatzerakoan...", azaldu du. Arazo horri irtenbidea emateko lanean segituko dutela gaineratu du: "Badator erregularizatzeko aukera berri bat. Egia da ez dela denentzat izango, baldintza batzuk betetzen dituztenentzako baizik. Guk bideak topatu beharko ditugu pertsona guztiak izan daitezen herriaren parte".
