Otsailaren 24tik 28ra bitartean Madrilen jokatu zen SpainSkills 2026 Lanbide Heziketako Estatuko Txapelketa, eta Miguel Altuna Lanbide Heziketako Peio Romero eta Gorka Domenech (Bergara, 2005) ikasleek osatutako bikoteak brontzezko domina eskuratu du Sistema Robotiko Integratuen modalitatean, euskal selekzioarekin. Halako txapelketa batean parte hartu duten lehendabiziko aldia izan da biendako, eta sariarekin oso gustura daude. "Sekulako esperientzia izan da", dio Domenechek. Romero ere "pozik" dago, baina "gauzak hobeto" egin eta irabazi egin zezaketela uste du. Dena den, esan du "oso ondo" pasatu dutela lehian zehar, eta asko ikasi dutela: "Oso esperientzia ona izan da".
Joan aurretik ez zuten espero dominarik irabazterik, baina txapelketa aurrera joan ahala aukerak ikusi zituzten. "Probak amaitutakoan ikusi genuen oso ondo egin genuela, eta bagenekien podiumean sartu gintezkeela", aitortu du Romerok. Domenechek gehitu du "besteek egin gabeko gauzak" lortu zituztela.
Kategoria berria
Iaz Irungo Ficoban egin zuten EuskoSkillseko emaitzagatik sailkatu ziren SpainSkillsera Romero eta Domenech. Bigarrenak izan ziren, baina "lehen postuan geratu zirenek ez zuten Madrilera joan nahi", eta, orduan, eurei eman diete aukera. EAEn arlo horretan egiten zen lehen edizioa izan zen hura, eta Espainian, berriz, bigarrena.
Euskal Selekzioarekin 34 ikasle
Euskal Autonomia Erkidegoko 34 ikaslek hartu dute parte txapelketan, eta Espainiako 564k. Lehiaketa 34 kategoriatan banatuta dago, eta urrea lortu dutenek irailean Shanghain jokatuko den WorldSkillsera joateko txartela eskuratu dute.
Sistema Robotiko Integratuen kasuan, hiru egunetan zehar garatu dute proiektua. Robotaren zelula muntatu –fisikoki eta ordenagailuko programan– eta robota programatu behar izan dute; baita dokumentu bat sortu ere, robotaren jarraibideekin, eta lantegiko pertsona batek dena ondo ulertzeko robotaren pantaila bat sortu ere bai.